Petit Seminaire Baptiste de Butare (PSBB) yigaho abakinnyi ba APR WFC na GS APE-Rugunga yigaho abakinnyi b’INTARE FC begukanye ibikombe by’irushanwa rihuza amashuri.
PSBB yegukanye igikombe itsinze CFC ibitego 2-0, iyi ikaba yari yasezereye APAER yigaho abakinnyi bakinira Police WFC iyiteye mpaga.
Muri 1/2 cy’irangiza PSBB yari yasezereye GS Remera Rukoma yigaho abakinnyi ba Kamonyi WFC.
GS APE-Rugunga yo yegukanye igikombe mu bahungu itsinze ibitego 2-0 College George Fox de Kagarama (CGFK) na yo yigaho abakinnyi b’INTARE FC, muri 1/2 cy’irangiza ikaba yari yasezereye Star yo mu Karere ka Gasabo.
Iyo mikino y’amarushanwa yasorejwe i Muhanga kuva kuwa gatandatu no kuri iki cyumweru tariki ya 8/6/2025 ikaba yarakurikiranywe na Perezida w’INTARE FC, Bwana Gatibito Byabuze.
CGFK yari ihagarariye Akarere ka Kicukiro, GS APE Rugunga ihagarariye aka Nyarugenge, mu gihe PSBB yo yari ihagarariye Akarere ka Huye.
PSBB, CFC mu bakobwa na GS APE-Rugunga na CGFK mu bahungu ni zo zizahagararira u Rwanda mu mikino ihuza amashuri yo mu Karere ka Afurika y’iburasirazuba (FEASSA) izabera i Nairobi muri Kenya muri Kanama uyu mwaka.
