Kuwa Gatanu Tariki 22 Gicurasi 2020, nibwo ishyirahamwe ry’umupira w’amaguru mu Rwanda FERWAFA ryafashe icyemezo cyo guhagarika shampiyona yari igeze ku munsi wa 23 kubera icyorezo cya Coronavirus, maze igikombe gihabwa APR FC yari iyoboye urutonde rwa shampiyona.
Iki kikaba ari gikombe cya 18 ikipe y’ingabo z’igihugu yegukanye mu mateka yayo, kuva yashingwa muri 1993. APR FC kandi muri shampiyona ya 2019-2020 yakinnye imikino 23 ntiyatsindwa umukino n’umwe.
Ubuyobozi bwa APR FC bukaba bwaboneyeho umwanya wo gushimira abakinnyi, abatoza ndetse n’abakunzi ba APR FC bose bashyize hamwe kugira ngo iki gikombe bakegukane, nk’uko umuyobozi wungirije Major General Mubarakah Muganga yabidutangarije.
Yagize ati: “Ntabwo twabona uko dukora ibirori ngo twishimire iki gikombe kuko turi mu bihe byo kurwanya icyorezo cya Coronavirus, ariko ndagira ngo nshimire umuryango mugari wa APR FC (abayobozi, abakinnyi, abatoza n’abakunzi) twese twafatanyirije hamwe kugira ngo twegukane iki gikombe”
Uyu muyobozi kandi yakomeje abwira Abakunzi ba APR FC ko abashimira, ariko anaboneraho no kubibutsa gukomeza kwirinda no kurwanya icyorezo cya Coronavirus.
Yakomeje agira ati: “Birumvikana ni ibyishimo ku bakunzi ba APR FC ariko ndagira ngo mbasabe mukomeze kwirinda no kurwanya icyorezo cya Coronavirus kugeza igihe tuzagitsinda burundu ku butaka bw’igihugu cyacu”
“Ndagira ngo kandi nshimire amakipe yose (abanyamuryango ba FERWAFA) ko baduhaye uburyo bwo guhatana. Mbonereho no gusezeranya abakunzi ba APR FC intsinzi zisukiranya”
Tubibutse ko Shampiyona y’icyiciro cya mbere ishyizweho akadomo kubera Coronavirus, APR FC idatsinzwe umukino n’umwe iri ku mwanya wa mbere n’amanota 57 mu mikino 23, ikaba yaratsinze 17 inganya itandatu. Yatsinze ibitego 44 yinjizwa 11 ikaba yari izigamye 33. Ikurikiwe na Rayon Sports yari ifite amanota 50 ndetse na Police ku mwanya wa gatatu na 43.