E-mail: administration@aprfc.rw

Impamvu Ndayishimiye Dieudonne ashingiraho ashimangira ko azitwara neza muri uyu mwaka

Myugariro wa APR FC, Ndayishimiye Dieudonne aratangaza ko afite icyizere kinshi ko azitwara neza cyane muri uyu mwaka wa shampiyona nyuma yo kwerekeza mu ikipe y’ingabo z’igihugu avuye muri AS Muhanga muri Nyakanga 2020.

Ndayishimiye w’imyaka 22, yari mu bakinnyi batandatu bashya APR FC yongereye mu ikipe kugira ngo bazayifashe mu myaka ibiri iri imbere.

Ubwo shampiyona y’umupira w’amaguru yahagarikwaga kubera icyorezo cya COVID-19, Ndayishimiye yasubiye mu rugo nk’abandi bakinnyi bose afite intego zo kuzagaruka ari ku rwego rwo hejuru.

Aganira na APR FC Website, uyu myugariro twatangiye tumubaza uko akomeje kwitwara muri iki gihe shampiyona yasubitswe kubera COVID-19.

Yagize ati: ”Muri iyi minsi Shampiyona yasubitswe ndi gukora cyane kugira ngi urwego nari ndiho ntiruzamanuke ahubwo ruzazamuke kurushaho kugira ngo nzaze ndi hejuru kuko mpanganye n’abakinnyi bakomeye ku mwanya wanjye.”


Icyizere afite cy’uko azitwara neza muri uyu mwaka.

Yagize ati: ”Icyizere ndagifite kinshi ko nzitwara neza cyane nshingiye ko ndi mu ikipe nziza, mfite umutoza mwiza ndetse n’abungiriza be beza, abayobozi bacu ni indashyikirwa baduha buri kimwe kandi nanjye ndabizi ko ngomba gukora cyane kuko naje mu ikipe ihora ishaka ibikombe, nsinziriye gato nakwisanga hanze, si ugukorera ku gitutu ahubwo ni ukugendera mu murongo w’ikipe n’intego zayo.”

Afite icyizere kandi ko APR FC izitwara neza muri uyu mwaka kurusha uko yitwaye umwaka ushize.

Yagize ati: ”Muri iyi shampiyona niteze ko APR FC tuzitwara neza cyane kuko dufite abakinnyi beza cyane kuri buri mwanya n’abakinnyi bongeyemo nabo ni beza, bagiye bongeramo imbaraga mu myanya yose, ndabona izitwara neza kurusha uko yitwaye umwaka ushize. Iyo urebye buri mukinnyi mu myitozo no mukino aba afite intego kandi rusange nk’ikipe, izo mbaraga iyo zihuye nizo zibyara umusaruro mwiza ikipe igenda ibona umukino ku wundi.”

Arasaba abafana n’abanyarwanda muri rusange kwirinda icyorezo cya COVID-19.

”Abafana n’abanyarwanda muri rusange nabashishikariza kwirinda COVID-19 kuko itangiye gufata indi ntera, turabakunda cyane kandi turifuza kubabona ari bazima maze umunsi tuzayitsinda burundu bazagaruke kuri sitade duhure twishimane.”

Leave a Reply

Your email address will not be published.