Ikipe y’Ingabo z’Igihugu APR FC igomba guhagararira u Rwanda mu irushanwa Nyafurika rya CAF Champions league, itomboye US Monastir yo muri Tunisia mu ijonjora ry’ibanze rya CAF Champions League 2022/23
APR FC yabonye itike yo guhagararira u Rwanda mu mikino ya CAF Champions Leagu nyuma yo kwegukana igikombe cya shampiyona ya 2021/22 igikombe yegukanye ubugira gatatu yikurikiranya kuva yatangira gutozwa n’umutoza Adil Erradi Mohammed.
Mu gihe iyi kipe y’Ingabo z’Igihugu yaba isezereye ikipe ya US Monastir mu ijonjora ry’ibanze, yazahura na Al Ahly SC yo muri Misiri, mu ijonjora rya kabiri.
Imikino ibanza mu ijonjora ry’ibanze rya CAF Champions league iteganyijwe hagati y’itariki ya 09 na 11 Nzeri, mu gihe iyo kwishyura iteganyijwe hagati y’itariki ya 16 n’iya 18 Nzeri.
Imikino ibanza y’ijonjora rya kabiri ry’iri rushanwa yo iteganyijwe hagati y’itariki ya 07 n’iya 09 Ukwakira, mu gihe iyo kwishyura iteganyijwe hagati y’itariki ya 14 n’iya 16 Ukwakira.