APR FC yerekeje i Nyagatare aho izakinira na Sunrise ku munsi w’ejo

Ikipe y’ingabo z’igihugu yahagurutse i Kigali mu gitondo cyo kuri uyu wa Mbere, yerekeza mu karere ka Nyagatare yitegura gukina umukino w’umunsi wa cumi wa Shampiyona y’u Rwanda 209-20 uzayihuza na Sunrise kuri Stade Gorigota kuwa kabiri saa cyenda z’igicamunsi.

Bikaba biteganyijwe ko ikipe iza kurara i Gabiro mu kigo cya Gisirikare ikaza kuhakorera imyitozo ya nyuma uyu munsi yitegura umukino wo ku munsi w’ejo ari naho izahaguruka yerekeza mumugi wa Nyagatare.

Kapiteni Manzi Thierry mbere y’uko bahaguruka akaba yavuze ko intego ibajyanye ari ukuzana amanota atatu. Ati: Sunrise ni ikipe nziza inahagaze neza muri shampiyona ifite abakinnyi beza ndetse n’abatoza beza ariko natwe turiteguye neza intego yacu tumanukanye i Nyagatare n’ukuzamukana amanota atatu ku munsi w’ejo”

APR FC iri ku mwanya wa mbere by’agateganyo n’amanota makumyabiri na rimwe ndetse n’ibitego icumi izigamye mu gihe Sunrise bazakina nayo yo iri kumwanya wa gatandatu n’amanota cumi n’ane.