Ku gicamunsi cyo kuri uyu wa Gatanu, nibwo ikipe y’ingabo z’igihugu APR FC yakinaga umukino wayo w’umunsi wa karindwi wa shampiyona y’amakipe umunani na Rutsiro, iyitsinda ibitego bitandatu ku busa.
Ni umukino wabereye mu karere ka Huye kuri stade Huye, ari naho ikipe ya APR FC yakirira imikino yayo ya shampiyona 2020-2021, ni umukino watangiye ku isaha ya saa cyenda n’igice, ikipe y’ingabo z’igihugu yasabwaga gutsinda uyu mukino kugira ngo ibashe kwegukana igikombe cya shampiyona, ni nako bije kuyikundira ibasha gutahana amanota atatu itsinze Rutsiro ibitego 6-0.
Ibitego bitandatu bya APR FC byabontse muri uyu mukino, byatsinzwe na Yannick Bizimana watsinze ibitego bibiri ku munota wa 26′ na 39′ Mugunga Yves ku munota wa 50′ Maombi Jean Pierre witsinze igitego ku munota wa 58′ Ndayishimiye Dieudonne ku munota wa 63′ ndetse na Byiringiro Lague 88′
Tubibutse ko ikipe y’ingabo z’igihugu isoje shampiyona y’uyu mwaka 2020-2021 ifite amanota 19 aho inganya n’ikipe ya AS Kigali ariko APR FC ikaba izigamye ibitego 20 mu gihe ikipe ya AS Kigali yo isoje izigamye ibitego 12.
