E-mail: administration@aprfc.rw

Sugira Ernest yashimishijwe n’imitoreze y’Abatoza bashya.

Rutahizamu w’Ikipe y’Ingabo z’igihugu ndetse n’Amavubi Sugira Ernest atangaza ko yashimishijwe n’imitoreze y’Abatoza bashya nyuma y’iminsi itanu gusa bamaranye.

Kuwa Gatanu w’icyumweru gishize Tariki ya 2 Kanama 2019, nibwo APR FC yerekanye abatoza bashya barimo abanya-Maroc  ari bo Umukuru Mohammed Adil Erradi ndetse n’Umwungirije Bekraoui Nabiyl hakiyongeraho n’Uw’abanyezamu Mugabo Alex wavuye mu Ikipe ya Mukura Victory Sports.

Aba batoza batangiye imyitozo ya mbere bukeye kuwa gatandatu, bibanze ku y’ingufu nyuma y’uko bongeye guhuriza hamwe Ikipe yari imaze ibyumweru bibiri mu kiruhuko , igaruka mu myitozo yitegura Imikino ya gisirikare iteganyijwe gutangira ku Itariki ya 12 Kanama mu gihugu cya Kenya.

Sugira Ernest wahuye n’ikibazo cy’imvune cyatumye adakina mu mwaka w’imikino wa 2017-18 yitezweho kwigaragaza umwaka utaha
Yaba Umutoza mukuru Mohammed Adil Erradi (ibumoso) ndetse n’Uwungirije Nabiyl Bekraoui (iburyo) bashimishijwe n’ukuntu abasore muri rusange bashyira mu bikorwa inyigisho babaha umunsi ku wundi

Sugira asanga aba batoza bashya bari ku rwego rwo hejuru ndetse ari n’abanyamwuga nk’uko yabitangarije Umunyamakuru wa APR FC.

Yagize ati: “Icyo navuga kuri aba batoza, nkurikije aho tugeze dukorana, ni abatoza b’abanyamwuga ku rwego rwo hejuru, batwigisha imikinire igezweho kandi bakagerageza kubitwumvisha mu buryo butworoheye. Ntacyo nabanenga kuko turi gukorana neza cyane.”

Umutoza mukuru Mohammed Adil yakurikiranaga uko Sugira akora imyitozo yo kuboneza umupira mu izamu

Abajijwe itandukaniro abona hagati y’abatoza bashya n’abababanjirije bari bayobowe na   ‎Zlatko Krmpotić wari wungirijwe  Jimmy Mulisa batandukanye na APR FC nyuma yo kuviramo muri ½ cya CECAFA Kagame Cup 2019, uyu rutahizamu w’imyaka 28 akaba yatangaje ko nta tandukaniro rinini cyane riri hagati yabo, ndetse ko atanenga abababanjirije abita babi.

Ati: “Buri mutoza agira imitoreze ndetse n’imikinire ye, ntabwo navuga ko abo twatandukanye bari babi cyane ngamije kwerekana ko aba ari bo beza cyane. Abo twatandukanye bafite imitoreze yabo itandukanye n’iy’aba. Niryo tandukaniro.”

Sugira Ernest yerekeje muri APR FC mu mwaka wa 2017-2018 aturutse muri Vita Club yo muri Repubulika Iharanira Demokarasi ya Congo, aho yerekeje mbere yo kwitwara neza mu Irushanwa rya CHAN 2016 ryabereye mu Rwanda, icyo gihe kandi akaba yaranitwaraga neza mu Ikipe ya AS Kigali.

Erradi akoresha imbaraga nyinshi mu mitoreze ye abwira abakinnyi ko bagomba kwibanda cyane ku mikinire yabo kurusha iy’uwo bahanganye ndetse bakanigirira icyizere
Umutoza mukuru ubwo yashimiraga Myugariro Imanishimwe Emmanuel “Mangwende” nyuma yo guhinduraga umupira mwiza wavuyemo igitego cyatsinzwe na Sugira Ernest
Abakinnyi barisanzura bakabona umwanya wo gusobanuza aho batumvise neza
Umutoza mukuru Adil Erradi yereka rutahizamu ukiri muto Byiringiro Rague uko akwiye guhagarara mu rubuga rw’amahina
Umutoza wungirije Bekraoui Nabiyl nawe yafatanyije n’Umukuru kwita kuri Sugira Ernest, wahanganaga na ba myugariro barimo Kapiteni Manzi Thierry ndetse na Mutsinzi Ange
Rutahizamu Mugunga Yves (hagati) ari mu bitezweho kwitwara neza. nyuma yo kuzamurwa mu Ikipe ya mbere akuwe mu Intare FC mu mwaka ushize w’imikino
Umutoza mukuru Erradi aha amabwiriza Myugariro Ombolenga Fitina
Umutoza w’abanyezamu Mugabo Alex nawe ari mu batoza bashya ba APR FC
Sugira (hagati) ahanganye n’Umunyezamu Rwabugiri Umar mu myitozo
Bacishamo bagaseka
Nyuma y’imyitozo abakinnyi babwirwa uko imyitozo yagenze, aho bakwiye kongera imbaraga ndetse na gahunda y’umunsi ukurikiyeho

Iyumvire ikiganiro twagiranye na Sugira Ernest atubwira uko yakiriye imitoreze y’abatoza bashya

 

Leave a Reply

Your email address will not be published. Required fields are marked *