E-mail: administration@aprfc.rw

Ngabonziza Gylain: Imyitozo umutoza Adil aduha izadufasha cyane nitubona amahirwe yo gukina hanze y’u Rwanda


Umukinnyi ukina ku mpamde afasha abataha izamu muri APR FC, Ngabonziza Gylain asanga imyitozo ikipe y’ingabo z’igihugu iitangwa n’umutoza wayo umunya-Maroc Mohammed Adil iri ku rwego mpuzamahanga ndetse izorohereza abakinnyi nibaramuka bagize amahirwe yo kugera ku mugabane w’Uburayi.

Ngabonziza w’imyaka 18 akaba amaze umwaka umwe azamuwe mu ikipe ya APR FC avuye mu Intare FC ikina muri shampiyona y’icyiciro cya kabiri.

Ibi akaba yabitangaje mu kiganiro kirambuye yagiranye na APR FC Website ubwo yari abajijwe itandukaniro abona riri hagati y’imyitozo yakoraga mu Intare FC ndetse n’iyo ari gukoreshwa muri iki gihe mu ikipe y’ingabo z’igihugu.

Akaba yagize ati: ” Urebye mu Intare FC umutoza Rubona Emmanuel yatwigishaga itangiiro ry’umupira w’amaguru ndetse no mu kongera ingufu twarahibandaga cyane. Itandukaniro riba ririmo ni uko iyo ugeze muri APR FC hari icyiciro uba uvuyemo wigiye hejuru, binagusaba kukitaho cyane kuko akenshi ugomba kumva neza ibyo bakubwira, ukurikiza inama z’umutoza zose  kuko aba azi impamvu abikubwiye.”

”Umutoza Adil hari ukuntu ajya ahindura uburyo bw’imikinire nka butatu kandi bikaba ngombwa ko ubikora nk’uko abikubwira bitewe n’ikipe mugiye guhura, urebye imyitozo y’umutoza wacu iri ku rwego mpuzamahanga kuko ari imyitozo ubona itagutegura hano hafi gusa, igutegura no gukina hanze bibaye ngombwa uramutse ubonye ayo mahirwe. Hari ubumenyi bwinshi afite atwungura kubera ko yagiye akora amahugurwa ahantu henshi hatandukanye, n’ubwo turi mu rugo bidufasha kunguka ibintu byinshi cyane kugira ngo bitazatugora hagize ubona amahirwe yo gukina hanze y’u Rwanda.”


Ngabonziza Gylain mu mwaka we wa mbere muri APR FC, akaba yaratwaranye nayo ibikombe bitatu birimo icya gisirikare cya 2019, icy’intwari 2020 ndetse n’icya shampiyona 2019-20 idatsinzwe umukino n’umwe.

Leave a Reply

Your email address will not be published. Required fields are marked *