E-mail: administration@aprfc.rw

Mushimiyimana Mohamed: Umwaka utaha tuzakora ibyiza birenze ibyo twakoze shampiyona ishize

Umukinnyi wo hagati wa APR FC n’ikipe y’igihugu Amavubi Mushimiyimana Mohamed, aratangaza ko asanga ikipe y’umwaka utaha izitwara neza cyane birenze uko yitwaye umwaka ushize.

Ibi Mohamed akaba yabitangaje mu kiganiro kigufi twagiranye mu gitondo cyo kuri uyu wa Kane, aho yasobanuraga ukuntu umwaka ushize bahuye bataziranye, abatoza bashya, imikinire mishya ndetse n’intego nshya batahise bumva neza n’ubwo bagendaga basobanukirwa umunsi ku wundi.

Yagize ati: ”Nta tandukaniro rinini rizaba ririmo kubera ko zose zashakaga ibinti byiza, ikipe y’umwaka ushize ikintu cyatugoye ni uko tukigeramo twari tutaramenyerana kuko harimo abakinnyi twari dukinanye bwa mbere, nakwiheraho na bagenzi banjye nasanze nka 80% twari bashya mu ikipe, byansabye igihe kugira ngo tumenyerane ariko ubu impamvu nakubwira ko tuzitwara neza 100% kurusha uko twitwaye umwaka ushize irasobanutse.”

”Ubu buri mukinnyi wese wa APR FC amaze kumenya icyo ikipe imusaba, natwe ubwacu tumaze kumenyana neza haba mu kibuga no hanze yacyo, abatoza tumaze kumenyerana neza, tumaze kumenya icyo twakora kugira ngo dutsinde ndetse turibuka icyo twakoze umwaka ushize kugira ngo twitware neza.”

”Ikintu kizakorwa ni ukongera ibyiza ku byo twakoraga, ntabwo bizagorana nk’uko umwaka ushize byagoranye, ikindi tugenda dukura mu mikinire, tugiye gukina imikino ikomeye kandi buri umwe yariteguye, twabonye umwanya wo kwitekerezaho n’uwo kwita ku miryango yacu nizeye neza ko tuzaza dufite itandukaniro kandi dushaka ibyiza birenze ibyo twabonye umwaka ushize.”

Mohammed akaba ashimira cyane abafana batahwemye gushigikira ikipe yabo, anabasaba gutanga umusanzu urenze uw’umwaka ushize cyane ko APR FC igiye gukina amarushanwa akomeye kurusha ayo yitabiriye umwaka ushize.

Yagize ati: ”Ndashimira cyane abafana bacu beza ukuntu batubaye inyuma umwaka ushize kuko baratwiyeretse cyane, haba mu ntara cyangwa i Kigali, mu mvura no ku zuba igihe cyose twarababonye kandi mbasaba gukomeza kudufasha kuko tugiye mu mikino ikomeye bakadushyigikira birenze uko babikoraga, bamenye ko turi kumwe, uko bakunda ikipe yabo natwe niko tuyikunda, turi mu rugamba rumwe twese dushakira intsinzi hamwe kandi turabakunda cyane.”

Leave a Reply

Your email address will not be published.