E-mail: administration@aprfc.rw

”Mbere byari nk’inzozi ariko ubu igihe cyo kurota cyararangiye, nje gufasha APR FC kugera ku duhigo itarageraho”: Ruboneka Jean Bosco

Nyuma yo kwerekanwa ku mugaragaro nk’umukinnyi mushya wa APR FC Tariki ya 19 Nyakanga 2020, Ruboneka Jean Bosco ukina hagati afasha abataha izamu, aratangaza ko aje gufatanya na bagenzi be gufasha APR FC kwitwara neza ndetse ikagera ku duhigo itigeze igeraho mu mateka yayo.

Ni mu kiganiro yagiranye na APR FC Website, aho yatangiye atubwira umunsi wa mbere amenya ko APR FC imwifuza atigeze abiha agaciro ndetse aranabyirengagiza.

Yagize ati: ”Igihe numvise ko APR FC inyifuza nabibwiwe na Mupenzi Eto ushinzwe igura n’igurishwa ry’abakinnyi muri iyi kipe gusa ntabwo nabyemeye kuko nabanje kubyima agaciro cyane ko ntari muzi, hashize iminsi mike yarongeye arampamagara ambwira ko bantekerejeho, naratunguwe bingora kubyakira birangira nsinye.”

”Kuba natungurwa si ukuvuga ko ntabikwiye, oya narabiharaniye kuko intego yanjye mu mwaka wa shampiyona ushize yari iyo kujya mu ikipe ikomeye gusa igihe cyo kurota kuri njye cyararangiye kuri ubu ndi umukinnyi wa APR FC.

Ruboneka Jean Bosco yabanje no kugorwa kwemera ko yifuzwa na APR FC

Agira icyo avuga ku kuba yava muri AS Muhanga agahita akina amarushanwa mpuzamahanga ku mwaka we wa mbere akaba yavuze ko abifata nk’iterambere kuri we kandi rituma akora cyane kuko yiteguye akazi gakomeye karenze aho avuye

Yakomeje agira ati: ”Gukina amarushanwa nyafurika kuri njye ni intego nari narihaye, igihe nashyiragaho agahigo ko kuzitwara neza nkerekeza mu ikipe ikomeye narabyiyumvishaga ko na none nzahura n’abakomeye, iki nicyo gihe rero kandi nditeguye, ndakora imyitozo myinshi kugira ngo icyo gihe kizagere imyiteguro mfite mu mutwe iri ku rwego rumwe n’iy’umubiri.”

”Ndabizi ko nerekeje mu ikipe itwara ibikombe kandi ikina amarushanwa akomeye, kugira ngo mbone umwanya ubanza mu kibuga ngomba kubiharanira na nyuma yo kuwubona ngomba guharanira kuwugumana, ibyo byose bizaterwa no gukora cyane ndetse n’ikinyabupfura. Ndi hano kugira ngo mfashe APR FC kugera ku duhigo itarageraho”

Aje gufasha APR FC kuyigeza ku duhigo itarageraho

Uyu musore akomeza agatangaza ko yasanze afite inshuti nyinshi muri APR FC, ndetse zamuhamagaye kuri telfoni ye igendanwa zimuha ikaze umunsi yari amaze gusinyira APR FC, ibi bikaba bimuha icyizere ko yisanze mu muryango.

Yagize ati: ”Manishimwe Djabel, Ahishakiye Herithier ndetse na Mugunga Yves barampamagaye umunsi bamenya ko nasinyiye ikipe y’ingabo z’igihugu bampa ikaze mu muryango mushya wa APR FC ndetse bananyizeza ubufasha kuri buri kimwe kizatuma nisanga mu ikipe, nasanze ari ikipe y’abantu bagira urugwiro nanjye nishimira kuzakinana n’inshuti zanjye twari dusanzwe duhuza muri byinshi hanze y’ikibuga.”

Yerekeje muri APR FC mu mpeshyi y’uyu mwaka aturutse muri AS Muhanga

Ruboneka Jean Bosco w’imyaka 21, yerekeje mu ikipe y’ingabo z’igihugu nyuma y’isozwa rya shampiyona ya 2019-20 aturutse muri AS Muhanga yari amazemo imyaka ibiri yagezemo avuye muri Etoile de l’Est muri 2016, mu mwaka wa shampiyona 2019-20 akaba yaratanze imipira irindwi ibyara ibitego ndetse n’ibitego bitatu mu mikino 19.

Leave a Reply

Your email address will not be published. Required fields are marked *