Myugariro w’ikipe y’ingabo z’igihugu akaba na vice kapiteni wa kabiri Buregeya Prince, yatangaje uko abona shampiyona y’icyiciro cya mbere kugeza ubu imaze gukinwa imikino ibiri.
Ni mukiganiro uyu myugariro yagiranye n’urubuga rwa APR FC (www.aprfc.rw) avuga ko shampiyona y’uyu mwaka ikomeye cyane kuko amakipe yose kugeza ubu arimo kwitwara neza.
Yagize ati” Twatangiye neza dutsinda nibyiza, gusa shampiyona urabona ko ikomeye cyane kuko amakipe yose arimo gutsinda, muri make amakipe yose ameze neza.”
Buregeya Prince yakomeje avuga ko ubu haba hakiri kare kuba yavuga ku gikombe cya shampiyona kuko hamaze gukinwa imikino ibiri gusa, kandi ngo ikingenzi ni ukwitwara neza muri buri mukino.
Yagize ati” Ntago twavuga igikombe ku mikino ibiri gusa, ariko intego ya APR FC ni ugutwara ibikombe, imikino yose ni ingenzi icyo dushaka ni ukwitwara neza nk’ikipe tugatwara igikombe kandi dukina n’umukino mwiza.”
Tubituse ko kugeza ubu shampiyona igeze ku munsi wayo wa kabiri ikipe ya APR FC ikaba iri ku mwanya wa 2 aho inganya amanota n’ikipe ya AS Kigali zombi zifite amanota 6 gusa zigatandukanywa n’umubare w’ibitego zizigamye, AS Kigali izigamye ibitego 6 mu gihe APR yo izigamye ibitego 4.