E-mail: administration@aprfc.rw

Imbamutima za Sugira Ernest ugarutse mu Mavubi nyuma y’iminsi 741

Rutahizamu wa APR FC Sugira Ernest yishimiye kugaruka mu Ikipe y’Igihugu Amavubi, nyuma y’imyaka isaga ibiri atayagaragaramo ahanini kubera imvune za hato na hato zagiye zituma arenzwa ingohe n’abatoza bagiye basimburana guhera muri Kanama 2017.

Kuri uyu wa mbere Tariki 26 Kanama 2019 Umutoza w’ikipe y’igihugu Amavubi Mashami Vincent, yashyize hanze urutonde rw’abakinnyi 25 bazifashishwa mu mukino wo gushaka itike y’Igikombe cy’Isi cya 2022, u Rwanda ruzahuramo n’Ibirwa bya Seychelles Kuwa Kane tariki 5 Nzeri 2019, ukazabera kuri ‘People’s Stadium’ mu murwa mukuru Victoria.

Hari ku mugoroba wo kuwa 15 Kanama 2017 kuri Stade ya Kigali, ubwo uyu rutahizamu yavunikiraga mu myitozo yateguraga umukino Amavubi icyo gihe yatozwaga n’Umudage Antoine Hey, yagombaga kwishyuramo Uganda Cranes ibitego 3-0 yari yatsindiwe I Kampala mu mukino ubanza wo gushaka itike ya CHAN 2018. Guhera icyo gihe iminsi 741 ikaba yari yirenze uyu rutahizamu ataragaruka mu ikipe y’Igihugu Amavubi.

Sugira yitwaye neza muri CHAN 2016 abengukwa na AS Vita Club imutangaho miliyoni 100 z’amafaranga y’u Rwanda
Yitwaye neza mu Mikino ya Gisirikare aza muri ba rutahizamu batatu ba mbere batsinze ibitego byinshi

N’ibyishimo byinshi, Sugira akaba yabwiye abanyamakuru ba APR FC ko yishimye cyane kuko yahoraga arota kugaruka mu Ikipe y’Igihugu Amavubi ngo atange umusanzu we, ariko imvune zikamubera inzitizi.

Yagize ati: ‘’ Yego naherukaga mu Ikipe y’Igihugu kera, gusa nta ruhare nabigizemo kuko byatewe n’ikibazo cy’imvune. Nishimiye cyane guhamagarwa mu Mavubi nyuma y’igihe kirekire ntayagaragaramo, ni ibintu nakiriye neza byanshimishije cyane kandi nabihaye agaciro gakomeye.’’

Yakomeje agira ati: ‘’Ngiye gutanga imbaraga zanjye zose kugira ngo amarushanwa yose turi kwitegura imbere tuzayitwaremo neza kandi n’Ikipe y’Igihugu izabashe gucana umucyo ku ruhando mpuzamahanga’’

Umudage Antoine Hey watozaga Amavubi muri 2017 yari yasuye Sugira aho yari arwariye nyuma yo kuvunikira mu myitozo yateguraga Uganda Cranes

Sugira Ernest w’imyaka 28 akaba yaratangiye gukinira Amavubi ku myaka 22 gusa, kuwa 8 Nzeri 2013 mu mukino ubanza wo gushaka itike y’Igikombe cy’Isi cyabereye muri Bresil 2014, u Rwanda rwatozwaga na Eric Nshimiyimana rwatsindiwe mu mujyi wa Porto Novo muri Benin ibitego 2-0, uyu musore akaba yarabanje ku ntebe y’abasimbvura aza kwinjira mu kibuga mu gice cya kabiri.

Uyu rutahizamu yazamukiye mu Ikipe ya AS Muhanga mu mwaka wa 2012, ahakina umwaka umwe akomereza muri APR FC muri 2013-14, nayo yamazemo umwaka yerekeza muri AS Kigali yakiniye imyaka ibiri guhera 2014 kugeza 2016. Nyuma yo kwitwara neza muri CHAN 2016, yaje kubengukwa na AS Vita Club yo muri Repubulika Iharanira Demokarasi ya Congo yanamutanzeho akayabo ka miliyoni 100 z’amafaranga y’u Rwanda, yaje kuyikinira umwaka umwe muri mu 2017 nibwo yagarutse mu Rwanda muri  APR FC agikinira kugeza uyu munsi.

Urutonde rw’abakinnyi 25 bahamagawe mu Amavubi
Abanyezamu:

• Rwabugiri Umar (APR FC)
• Kimenyi Yves (Rayon Sports FC)
• Ndayishimiye Eric Bakame (AS Kigali FC)

Ba Myugariro :
• Ratubyaye Abdul (Colorado Rapids FC , USA)
• Nirisarike Salom ( FC Tubize, Belgium)
• Manzi Thierry (APR FC)
• Fitina Ombalenga (APR FC)
• Imanishimwe Emamanuel Mangwende (APR FC)
• Rutanga Eric (Rayon Sports FC)
• Bayisenge Emery (Saif Sporting Club, Bangladesh)
• Iradukunda Eric Radu (Rayon Sports FC)

Abo Hagati:
• Butera Andrew (APR FC)
• Muhire Kevin (Mir El Makkasa , Egypt)
• Mukunzi Yannick (Sandvikens IF, Sweden
• Niyonzima Haruna (As Kigali FC)
• Niyonzima Olivier Sefu (APR FC)
• Bizimana Djihad (Waasland Beveren, Belgium)
• Iranzi Jean Claude (RAyon Sports FC)

Ba Rutahizamu:
• Kagere Medie (Simba Sport Club, Tanzania)
• Tuyisenge Jacques (Petro Atletico, Angola)
• Hakizimana Muhadjiri (Emirates Club)
• Mico Justin (Police FC)
Sugira Ernest (APR FC)
• Manishimwe Djabel (APR FC)
• Sibomana Patrik (Young Africans , Tanzania)

Uyu musore yashyikirijwe igihembo cy’umukinnyi watsinze ibitego byinshi n’Umugaba mukuru w’Ingabo za Sudani y’epfo General Gabriel Jok Riak
Imikino ya Gisirikare yahiriye Sugira Ernest wari uvuye mu mvune y’igihe kirekire

Leave a Reply

Your email address will not be published.