E-mail: administration@aprfc.rw

Icyo ibyumweru bibiri byafashije Imanishimwe Emmanuel

Myugariro w’ibumoso wa APR FC n’ikipe y’igihugu Amavubi, Imanishimwe Emmanuel atangaza ko ibyumweru bibiri by’imyitozo byamufashije cyane nyuma y’amezi arindwi yari maze adakina umupira w’amaguru kubera icyorezo cya COVID-19 cyahagaritse ubuzima bw’isi yose harimo n’ibikorwa by’imikino.

Ibi Imanishimwe yabitangaje nyuma y’uko abakinnyi ba APR FC bahawe akaruhuko k’iminsi ibiri nyuma y’ibyumweru bibiri bari bamaze mu mwiherero i Shyorongi aho bageze Tariki 3 Ukwakira kwitegura umwaka utaha w’imikino.

Imanishimwe yagize ati: ”Muri ibi byumweru bibiri tumaze mu mwiherero navuga ko byanyongereye byinshi cyane yaba ku rwego rw’ubuhanga, gukinana no kumenyana na bagenzi banjye, umuvuduko, imbaraga z’umubiri n’ibindi byinshi, impamvu ni uko hari hashize igihe kinini tudakora imyitozo amezi agera kuri arindwi, ariko ibyumweru bibiri tumaze gukora twiyongereye byinshi cyane ku buryo tumaze kugaruka ku rwego nk’urwo umukinnyi w’umunyamwuga yaba ariho.

Mangwende yafashijwe cyane n’ibyumweru bibiri y’imyitozo

”Njyewe urwego nari ndiho mbere ntabwo rwari rwiza nyuma y’igihe kinini ntakora imyitozo ariko ubu ndi ku rwego banyitabaza aho ari ho hose nkagira ibyo ntanga, abatoza baduhaye byinshi. ni abatoza beza ntabwo byatugoye gukorana nabo n’ubwo harimo umushya ariko nawe twahise duhuza, navuga ko iki gihe tumaze cyadufashije cyane kuko byatumye tumenyana nk’itsinda ry’abakinnyi bose ndetse no kumenyerana n’abakinnyi bashya nabo kandi ntabwo byabagoye kugira ngo batwisangemo, mfite icyizere ko mu gihe gito kiri imbere tuzaba turi ku rwego rwo guhangana n’ikipe iyo ari yo yose mu marushanwa yose tuzitabira umwaka utaha.”

Imanishimwe asaba abakunzi b’ikipe y’ingabo z’igihugu kuzabashyigikira umwaka utaha kuko batazabatenguha.

”Abafana tubahishiye byinshi, turabasezeranya ko turi mu nzira nziza yo kuzabibaha. mu izina rya bagenzi banjye, nasaba abafana ko bagomba kudufasha bakadushyigikira natwe ntituzabatenguha.”

Ubu ari ku rwego rwiza rwakiwtabazwa igihe icyo ari cyo cyose
APR FC imaze ibyumweru bibiri i Shyorongi izasubirayo ku wa Mbere Tariki 19 Ukwakira

Ikipe y’ingabo z’igihugu ikaba izasubira mu mwiherero kuwa Mbere Tariki 19 Ukwakira nyuma yo kongera gupimwa COVID-19 ku nshuro ya gatatu.

Leave a Reply

Your email address will not be published. Required fields are marked *