Kuri uyu wa Gatanu nibwo hasozwaga Shampiyona y’amakipe umunani yazamutse mu matsinda ari nayo yagombaga kwishakamo ikipe izegukana igikombe cya Shampiyona ya 2020-2021.
Ubwo hakinwaga imikino ya nyuma kuri uyu wa Gatanu, nibwo ikipe y’ingabo z’igihugu yagukanye igikombe cya 19 cya Shampiyona ubugira kabiri idatsinzwe umukino n’umwe nk’uko yabigenje muri Shampiyona ya 2019-2020
Tubibutse ko ikipe y’ingabo z’igihugu imaze gukina imikino 35 ya Shampiyona idatsindwa aho muri uyu mwaka w’imikino 2020-2021, APR FC yegukanye igikombe itsinze imikino 12 inganya umwe kuko yatsinze itandatu ya mbere (itatu ibanza n’iyo kwishyura) inatsinda indi itandatu mu makipe umunani yari ahataniye igikombe cya Shampiyona, inganya umwe na AS Kigali FC ku gitego 1-1.
Mu mwaka ushize w’imikino wa 2019-2020, APR FC yatwaye Shampiyona imaze imikino 23 idatsindwa (irimo 16 yatsinze n’irindwi yanganyije) mu gihe iheruka gutsindwa umukino wa Shampiyona y’u Rwanda ku wa 25 Gicurasi 2019 ubwo yatsindwaga na Espoir FC ibitego 2-1 mbere yo gutsinda Police FC ibitego 2-0 mu mukino usoza umwaka w’imikino wa 2018/19.
Umutoza wa APR FC, Umunya-Maroc Adil Mohammed Erradi, amaze imikino 35 ya Shampiyona adatsindwa mu gihe mu mikino Nyafurika, yatsinze umwe, atsindwa undi muri ibiri yahuyemo na Gor Mahia FC yo muri Kenya.
Ni igikombe cya Shampiyona APR FC yegukanye, gisanze icyo mu 1995, 1996, 1999, 2000, 2001, 2003, 2005, 2006, 2006/07, 2008/09, 2009/10, 2010/11, 2011/12, 2013/14, 2014/15, 2015/16, 2017/18 na 2019/20.
Nyuma yo kwegukana igikombe cya Shampiyona bivuze ko APR FC izahagarira u Rwanda mu mikino mpuzamahanga ya Afurika CAF Champions League ya 2021/22.
