E-mail: administration@aprfc.rw

APR FC yasezerewe na AS Kigali mu gikombe cy’Amahoro 2019

Nyuma yo gutsindwa igitego kimwe ku busa mu mukino ubanza byatumye APR FC isezerewe mu gikombe cy’Amahoro 2019 nyuma yo kunganya na AS Kigali ubusa ku busa mu mukino wo kwishyura wa 1/8 cy’igikombe cy’Amahoro.

N’umukino wabaye kuri iki Cyumweru kuri stade ya Kigali i Nyamirambo, ikipe ya APR FC yasabwaga byibura igitego kimwe hanyuma bagakizwa na penalite cyangwa se igatsinda ibitego birenze kimwe igakomeza itarinze kwiyambaza za penalite.

Igice cya mbere ikipe ya APR FC yihariye umukino iminota 45′ yose umupira wakiniwe cyane mu gice cya AS Kigali, APR yabonye amahirwe menshi imbere y’izamu rya AS Kigali, ariko igorwa cyane no kubona igitego kugeza ubwo iyi minota yose yaje kurangira abakunzi ba APR bagitegereje igitego ariko bakomeza kwizera ko ikipe ya iza kubikora mu gice cya kabiri.

Mu gice cya kabiri umutoza Zlatko wari wagarutse nyuma yo gukiruka marariya, yahise akora impinduka akuramo Nshimiyimana Amran ashyiramo Byiringiro Lague, APR FC nabwo yongera kwiharira umukino ari nako Zlatko yashishaga ibisubizo agenda yongeramo amaraso mashya ubwo yashyiragamo Sugira Ernest agakuramo Nkinzingabo Fisto naho Michel yasimbuwe na Iranzi.

Izi mpinduka zose nta gisubizo zabashije gutanga ku ruhande rwa APR FC yifuzaga gukomeza muri 1/4, kuko umukino waje kurangira amakipe yombi anganyije ubusa ku busa ikipe ya APR FC isezerwa mu gikombe cy’Amahoro nyuma yo gutsindwa umukino ubanza igitego kimwe ku busa.

Leave a Reply

Your email address will not be published. Required fields are marked *