E-mail: administration@aprfc.rw

APR FC yakuye amanota atatu kuri Gasogi United ikomeza kuyobora urutonde rwa shampiyona

Manishimwe Djabel,Omborenga Fitina na Mugunga Yves nibo bafashije APR FC gukura amanota atatu kuri Gasogi United mu mukino w’umunsi wa 13 wabereye kuri Stade ya Kigali i Nyamirambo.

APR FC yakiriye uyu mukino idafite bamwe mu bakinnyi bayo b’inkingi za mwamba barimo kapiteni wayo Manzi Thierry ,myugariro Mutsinzi Ange ndetse na Niyonzima Sefu bafite ibibazo bitandukanye by’uburwayi n’imvune.

APR FC niyo yafunguye amazamu ku munota wa 43 ku gitego cyatsinzwe na Usengimana Danny waherejwe umupira mwiza na Niyomugabo Claude ubwo abakinnyi ba Gasogi United bibwiraga ko yaraririye.

Igice cya kabiri, ikipe ya Gasogi United yagitangiye isatira bikomeye ndetse biza kuyihira, ibona igitego cyo kwishyura cyatsinzwe na Muganza Isaac ku munota wa 48 n’umutwe, ku mupira wari uvuye muri koruneri yatewe na Ndekwe Félix, nyuma y’iminota ine gusa, Gasogi United yaje kubona igutego cya kabiri gistinzwe na Muganza Isaac.

Nyuma yo kwinjizwa ibitego bibiri byatumye Mohammed Adil akora impinduka ebyiri, aho yakuyemo Manishimwe Djabel na Nizeyimana Djuma akinjizamo Ishimwe Anicet na Ishimwe Kevin, zagize uruhare cyane mu gutuma APR FC ibona umusaruro muri uyu umukino.

APR FC yaje kubona igitego cya kabiri cyo kwishyura ku munota wa 80, gitsinzwe na Omborenga Fitina mu gihe nyuma y’iminota ibiri, Mugunga Yves winjiyemo asimbuye Usengimana Dany, yaje gutsinda igitego cyahesheje ikipe y’ingabo amanota yose kuri uyu munsi wa 13.

Gutsinda uyu mukino byatumye APR FC igira amanota 31 ku mwanya wa mbere, irusha amanota atandatu Rayon Sports na Police FC ziyikurikiye, zo zigomba gukina uyu munsi ku Cyumweru.

Leave a Reply

Your email address will not be published.