E-mail: administration@aprfc.rw

APR FC ntabwo izitabira AGACIRO FOOTBALL TOURNAMENT 2019

Ubuyobozi bw’Ikipe ya APR FC Kuri uyu wa Kabiri bwamenyesheje Ishyirahamwe ry’umupira w’amaguru mu Rwanda Ferwafa ko APR FC itazitabira Irushanwa ry’AGACIRO Football Tournament 2019 riteganyijwe gukinwa ku matariki ya 12, 14 ndetse na 25 Nzeri 2019.

Nk’uko byamenyeshejwe Ferwafa mu Ibaruwa yasinyweho n’umunyamabanga mukuru Lt. Col Sekaramba Sylvestre, hari impamvu zitandukanye zitumye APR FC ititabira iri rushanwa harimo imvune abakinnyi bakuye mu mikino ya Gisirikare iheruka gusozwa muri Kenya ndetse no kuba benshi mu bakinnyi bazaba bari mu Ikipe y’Igihugu bityo bikaba bitakoroha ko bakina muri iyi mikino yegeranye.

Ibaruwa Umunyamabanga mukuru wa APR FC Lt. Col Sekaramba Sylvestre yandikiye FERWAFA

 

Umunyamabanga mukuru wa APR FC Lt. Col Sekaramba Sylvestre yajyanye n’Ikipe mu Mikino ya Gisirikare muri Kenya

Hejuru y’ibi, APR FC ifite abakinnyi umunani bashobora no kwiyongeraho abandi, bazaba bari gutanga umusanzu mu Ikipe y’Igihugu mu mikino y’amajonjora yo gushaka itike y’Igikombe cy’isi cya 2022 ndetse no mu mukino wo gushaka itike yo kujya muri CHAN 2020 U Rwanda ruzahuriramo na Ethiopie.

Aba bakaba barimo, Rwabugiri Umar, Manzi Thierry,  Ombolenga Fitina, Imanishimwe Emmanuel, Butera Andrew, Niyonzima Oliver Sefu, Manishimwe Djabel ndetse na Sugira Ernest.

Abakinnyi APR FC yatanze mu Mavubi yitegura imikino y’amarushanwa atandukanye izakinwa muri Kanama na Nzeri uyu Mwaka

Ba rutahizamu Nshuti Innocent na Nizeyimana Djuma bafite ibibazo bitandukanye by’imvune byanatumye batagaragara mu mikino ya Gisirikare, kongeraho Meddy Mushimiyimana wayivunikiyemo akaba akitabwaho n’abaganga.

Izi mpamvu zikaba ari zo zitumye APR FC itazitabira iri rushanwa ry’Agaciro Football Tournament 2019.

Ba rutahizamu Nshuti Innocent na Nizeyimana Djuma bahuye n’ibibazo by’imvune mbere y’Imikino ya Gisirikare, mu gihe Meddy Mushimiyimana we yayivunikiyemo bakaba bakomeje kwitabwaho n’abaganga

Leave a Reply

Your email address will not be published. Required fields are marked *