E-mail: administration@aprfc.rw

APR FC itsinze Kiyovu Sports itahukana amanota atatu ya mbere muri shampiyona

Ikipe ya APR FC yegukanye itsinzi yayo ya mbere mu mukino w’umunsi wa gatatu wa shampiyona ariko ikipe y’ingabo z’igihugu ikaba yakinaga umukino wayo wa mbere, ni intsinzi yabonetse igizwemo uruhare na Mutsinzi Ange maze Kiyovu Sports iritsinda ku munota wa 36 wumukino.

Ni umukino waranzwe no guhanahana cyane ku ikipe ya APR FC byaje no gutanga amahirwe yo gusatira cyane ariko umunyezamu Kimenyi Yves atabara izamu rye ubwo hari ku munota wa cyenda gusa ubwo Djabel yari ateye umupira ukomeye uca iruhande rw’izamu.

Ntibyaje gutinda na none ku munota wa 22, Nizeyimana Djuma yagerageje gutera umupira ukomeye uca imbere y’izamu rya Kiyovu Sports.

Ikipe ya Kiyovu Sports yanyuzagamo igasatira, ubwo hari ku munota wa 28 rutahizamu Saba Robert yagerageje ishoti rikomeye rikurwaba n’umunyezamu Ahishakiye Herithier wakuyemo imipira ibiri ya Kiyovu Sport yakabaye ibona igitego.

Ikipe ya APR FC yaje kubona igitego cya mbere cyatsinzwe ubwo hari ku munota wa 36 w’umukino ku mupira watewe mu rubuga rw’amahina na Mutsinzi Ange wari wamanutse, awoherereza rutahizamu Tuyisemge Jacques maze umunyezamu Kimenyi Yves arawumutanga, agerageza kuwukuramo ariko uhura na myugaruro Serumogo Ally uhita uboneza mu nshundura.

Ikipe y’ingabo z’igihugu yari bujye kuruhuka iyoboye n’ibitego bibiri ubwo habonetse Penaliti ku munota wa 45 w’umukino, ku ikosa ryakorewe Djabel Imanishimwe, Byiringiro Lague ayiteye ikurwamo na Kimenyi Yves kapiteni wa Kiyovu Sports. Maze amakipe yombi ajya kuruhuka ari igitego kimwe cya APR FC ku busa bwa Kiyovu Sports.

Ku munota wa 68, Byiringiro Lague yahinduye imbere y’izamu habura umuntu uwushyira mu izamu ngo habe haboneka ikindi gitego. APR FC yakomeje gusatira maze ku munota wa 82 w’umukino rutahizamu Mugunga Yves abona amahirwe yo kuba yatsinda igitego cya kabiri ariko ntibyamuhira maze ateye ishoti rikurwamo na Kimenyi Yves wohereje umupira muri koruneri.

Muri uyu mukino kandi habonetsemo ikarita itukura ku ruhande rwa Kiyovu Sports ubwo hari ku munota wa 89 w’umukino, ubwo umukinnyi wo hagati Habamahoro Vincent yahawe ikarita ya kabiri y’umuhondo nyuma y’ikosa yakoreye kuri kapiteni Manzi Thierru bityo ahabwa itukura yerekeza mu rwambariro rw’ikipe ya Kiyovu Sports.

Umutoza Mohammed Adil yakoze impinduka zitandukanye muri uyu mukino, aho ku munota wa 60′ Tuyisenge Jacques wagize uruhare mu gitego cya mbere yasimbuwe na Bizimana Yannick. Ku munota wa 75 kandi yasimbuye Byiringiro Lague mu gihe Nsanzimfura Keddy we yasimbuye Nizeyimana Djuma bose bahuraga n’ikipe banyuzemo ya Kiyovu Sports.

Nyuma yo kubona amanota atatu kuri uyu mukino, ikipe ya APR FC iritegura urugendo rw’umunsi wa kane wa shampiyona aho izerekeza i Nyagatare gukina na Sunrise FC, ni umukino utegerejwe ku wa Mbere tariki ya 15 Ukuboza 2020.

 

Leave a Reply

Your email address will not be published.