Kuri uyu wa Mbere Tariki 19 Ukwakira saa sita n’igice z’amanywa, ikipe y’ingabo z’igihugu isesekaye i Shyorongi muri Dian Fossey Hotel mu mwiherero nyuma y’akaruhuko k’iminsi ibiri yari yahawe n’umutoza Mohammed Adil, afatanyije n’abatoza abagenzi be bari bamaze ibyumweru bibiri bayiha imyitozo yo kwitegura umwaka utaha w’imikino 2020-21.
Ku munsi wejo ku Cyumweru nibwo abakozi bose ba APR FC bapimwe COVID-19 kugira ngo barebe uko bahagaze mbere yo gusubira mu mwiherero mu rwego rwo gukumira iki icyorezo.
Nyuma yo kwegukana igikombe cya shampiyona ya 2019-20 idatsinzwe , umwaka utaha w’imikino APR FC izitabira amarushanwa y’imbere mu gihugu, CECAFA Kagame Cup 2021 ndetse na CAF Champions League. Ikaba ifite intego yo gutwara ibikombe byose bikinirwa mu Rwanda, CECAFA Kagame Cup ndetse no kugera mu matsinda ya CAF Champions League.
Ikipe y’ingabo z’igihugu ikaba iri busubukure imyitozo ku gicamunsi cyo kuri uyu wa mbere.
