E-mail: administration@aprfc.rw

APR FC isoje imyitozo ya nyuma mbere yo guhura na Musanze FC

Ikipe ya APR FC isoje imyitozo ya nyuma mbere yo guhura na Musanze FC mu mukino w’umunsi wa 25 wa shampiyona y’icyiciro cya mbere ku munsi w’ejo kuwa kane kuri sitade Ubworoherane saa15H30.

Ikipe ya APR FC yamaze kugera mu karere ka Musanze, ari naho izakinira ku munsi w’ejo na Musanze Fc, usibye abakinnyi barwaye nka kapiteni Mugiraneza ndetse na Nshuti Savio, batabashije kujyana n’ikipe, mutoza Petrovic akaba yahagurukanye abakinnyi 19 azakuramo 18 azifashisha imbere ya Musanze FC. APR FC nyuma yo kugera i Musanze babanje gufungura ndetse banaruhukaho nyuma bajya gukora imyitozo, ubu bakaba basoje imyitozo ya nyuma bakoreye ku kibuga bazakiniraho ku munsi w’ejo bose bakaba bameze neza.

APR FC izakina uyu mukino yagaruye bamwe mu basore bayo b’inkingi za mwamba, uwo ni umunyezamu Kimenyi Yves usanzwe ari umunyezamu wa mbere muri iyi kipe, ndetse na Amran Nshimiyimana, bombi batagaragaye mu mukino APR iheruka gukina n’Amagaju kubera ko bari bafite amakarita y’umuhondo atatu.

Nyuma y’iyi myitozo tukaba twaganiriye n’umutoza Petrović atubwira uko biteguye neza uyu mukino ati: ejo dufite umukino ukomeye cyane, umukino tuzakina na Musanze ikipe nziza izaba iri iwayo, ikipe ifite umutoza mwiza wahoze atoza Police FC ndetse n’andi makipe, ifite n’abakinnyi beza bafite ubunararibonye mu mupira w’amaguru, gusa ni ibyiza ko tuzaba turikumwe na Kimenyi ndetse na Amran batakinnye ubunshize ubwo nugutegereza iminota 90 ntakindi.

 

Leave a Reply

Your email address will not be published.