E-mail: administration@aprfc.rw

Amagambo umutoza Adil yabwiye Mushimiyimana Mohamed mbere yo kumuhindurira umwanya akamushyira mu bwugarizi


Mushimiyimana Mohammed ukina hagati muri APR FC ndetse n’ikipe y’iihugu Amavubi, yatangaje amwe mu magambo yabwiwe n’umutoza Mohammed Adil mbere yo kumuhindurira umwanya akamukura hagati mu kibuga akamukinisha mu bwugarizi.

Tariki ya 04 Ukwakira 2019 ku mukino ufungura shampiyona ya 2019-20 ubwo AS Kigali yakiraga APR FC kuri Stade ya Kigali ndetse amakipe yombi akanganya igitego 1-1, ba myugariro babiri b’ikipe y’ingabo z’igihugu Mutsinzi Ange yaje kugira ikibazo ubwo yagonganaga n’umukinnyi mugenzi we ku munota wa 22 asimburwa na Buregeya Prince nawe wagize imvune ku munota wa 65 w’umukino asimburwa na Bukuru Christopher.

Nyuma y’uko aba ba myugariro bombi bavunikiye icyarimwe, umutoza Mohammed Adil watozaga umukino we wa mbere muri shampiyona ayafashe icyemezo cyo guhindurira umwanya Mushimiyimana Mohammed ”Meddy” amukura hagati mu kibuga amusubiza inyuma mu bwugarizi gufatanya na kapiteni Manzi Thierry.

Mu gihe Buregeya Prince wari usimbuye Mutsinzi Ange nawe yari amaze kuvunika yitabwaho n’abaganga, Mohammed Adil yarebye ku ntebe y’abasimbura abura igisubizo ari bwo yahise ahamagara Meddy amwumvisha ko agomba gusubira inyuma kuko yamubonyemo ubwo bushobozi.

Aganira na APR FC Website Meddy w’imyaka 26, akaba yatubwiye byinshi umutoza Adil yamubwiye maze bituma yakirana yonbi icyemezo cyo guhindurirwa umwanya nyuma atangira kwiyumva ko imyanya yose mu kibuga ari iye.

Yagize ati: ”Umutoza yaranyicaje aranganiriza anyereka inyungu ziri mu gukina imyanya myinshi, yaba ku ruhande rwanjye, ku ruhande rw’ikipe ndetse no koroshya akazi k’umutoza, ariko jambo ry’ingenzi yambwiye ni uko umukinnyi w’umunyamwuga agomba kuba yiteguye gukina imyanya myinshi ko amakipe akina kinyamwuga akenera abakinnyi bakina imyanya irenze umwe, yakomeje ambwira kandi ko yambonyemo ubwo bushobozi ko mbishoboye kandi nkaba nabikora neza. Kubera ineza n’iterambere umutoza wanjye yanyifurizaga nanjye nemeye ntazuyaje kandi musezeranya ko ndi bubikore kandi nkagerageza kubikora neza.”

”Akenshi iyo ugeze mu gihe nka kiriya umutoza nta yandi mahitamo afite areba wowe rukumbi nk’igisubizo cy’ikipe yose ku mwanya runaka, uba ugomba kwitanga ucungana n’ibintu bitatu. Kurwanirira ishema ryawe kugira ngo uwo muhanganye atabona icyuho akaba yaca ku mwanya wawe, guha umutoza icyizere agaterwa ishema n’icyemezo yafashe ndetse no kwereka abareba umukino ko hari byinshi wakora birenze ibyo bagutegerejemo.”

”Ibyo byose nakomeje guhangana nabyo ndetse ngerageza kubikora neza kugeza ubwo Mutsinzi Ange na Buregeya Prince nari nasigariyeho bagarutse ngasubira hagati mu kibuga kandi umutoza yarabinshimiye cyane.”

Mushimiyimana Mohammed ni inkingi ya mwamba ya APR FC
Umutoza Mohammed Adil yasabye Meddy gukina imyanya myinshi mu kibuga kuko abanyamwuga ari ko bakina

Mushimiyimana yakomeje atangaza ko icyamuhaga icyizere umunsi ku wundi ko akomeje kwitwara neza ku mwanya yimuriweho ari umutoza wamwerekaga uko bakina uwo mwanya ndetse akamubwira kenshi ko ari kubikora neza.

Yagize ati: ”Icyakomeje kumpa icyizere umukino ku wundi nka 90% ni umutoza Adil, kuko niwe wanyerekaga uburyo nakina bya kinyamwuga, mbere ya buri mukino yabanzaga kunyicaza njyenyine akanganiriza ambwira uko ba myugariro bo hagati bakina, nyuma yo kunsobanurira yahamagaraga n’abo turi bukinane inyuma kuri uwo mukino twese akatubwirira hamwe uko tugomba kwitwara akenshi yibanda ku gutabarana igihe twasatiriwe.”

”Adil si umutoza w’umukino umwe gusa ahubwo ashobora kukubwira ijambo rimwe rikazagufasha mu gihe cyawe cyose uzaba ugikina umupira w’amaguru, ubu siniyumva nk’umukinnyi wo hagati gusa ahuwo numva imyanya yose yo mu kibuga ari iyanjye kandi niteguye kwitabazwa aho nkenewe hose igihe icyo ari cyo cyose kandi ngatanga imbaraga zanjye zose.”

Numa y’ikibazo cya Mutsinzi Ange n’imvune ya Buregeya Prince, imwe mu mikino Mushimiyimana Mohammed yakinishijwe nka myugariro harimo n’uwo APR FC yatsinzemo Marines FC 2-1 kuri Stade Umuganda
Myugariro Mutsinzi Ange yagarutse ku mukino w'umunsi wa gatanu wa Shampiyona APR FC itsinda AS Muhanga ibitego 2-0
Mutsinzi Ange yagarutse ku munsi wa gatanu wa shampiyona APR FC itsinda AS Muhanga 2-0 kuri stade ya Kigali
Mushimiyimana Mohammed yafashije APR FC gutwara ibikombe bitatu mu mwaka we wa mbere

Mushimiyimana Mohammed yaciye mu makipe anyuranye nka AS Kigali, Győri ETO yo muri Hongrie ndetse na Police FC yavuyemo yerekeza mu ikipe y’ingabo z’igihugu cy’u Rwanda Tariki 2 Kanama 2019, aza no kuyiheshya ibikombe bitatu ku mwaka we wa mbere.

Leave a Reply

Your email address will not be published. Required fields are marked *