Nyuma y’ikiruhuko cy’iminsi ibiri umutoza Mohammed Adil yari yahaye abasore be, bongeye gupimwa COVID-19 bwa gatatu hamwe n’abandi bakozi ba APR FC kuri iki Cyumweru saa yine za mu gitondo Tariki 18 Ukwakira mbere y’uko basubira mu mwiherero i Shyorongi gukomeza imyitozo.
Nyuma y’icyo kiruhuko abakaba bagomba gusubira mu mwiherero kuri uyu wa Mbere Tariki 19 Ukwakira, gusa mbere y’uko basubirayo bakaba babanje kongera gupimwa COVID-19 bwa gatatu kugira ngo bamenye uko bahagaze. Iki gikorwa cyabereye mu bitaro bya gisirikare bya Kanombe (Rwanda Military Hospital) saa satatu za mu gitondo, kitabiriwe n’ abakinnyi 31, Abatoza 4 n’abandi bakozi bose bashinzwe ubuzima bwa buri munsi bw’ikipe.
Kuwa Kabiri Tariki 29 Nzeri 2020, nibwo abakozi bose b’ikipe ya APR FC bapimwe icyorezo cya COVID-19 ku nshuro ya mbere nyuma y’itangazo rya Minisiteri ya siporo ryakomoreraga itangira ry’ibikorwa bya siporo mu gihugu hose ryasohotse kuwa Mbere Tariki 28 Nzeri, bongeye gupimwa ku nshuro ya kabiri wa Gatandatu Tariki 10 Ukwakira 2020, nyuma y’icyumweru bari mu mwiherero i Shyorongi bakora imyitozo itegura umwaka w’imikino wa 2020-21.
Nyuma yo kwegukana igikombe cya shampiyona ya 2019-20 idatsinzwe, umwaka utaha w’imikino APR FC izitabira amarushanwa y’imbere mu gihugu, CECAFA Kagame Cup 2021 ndetse na CAF Champions League. Ikaba ifite intego yo gutwara ibikombe byose bikinirwa mu Rwanda, CECAFA Kagame Cup ndetse no kugera mu matsinda ya CAF Champions League.
Amafoto yaranze iki gikorwa:
